Animación á lectura de Kalandraka: Pablo Nogueiras visita o noso cole

Hoxe as trasniñas e trasniños recibimos, xunto co resto de alumando de infantil, unha visita moi especial, Paco Nogueiras. Chegou a nosa escola dende KALANDRAKA, a fábrica dos libros para soñar, con el trouxo o seu acordeón, o ukelele e unha maleta chea de contos.

Paco contounos e cantounos "tarde de sapo" a historia dunha tarde calquera de sapo e outros bechiños, fixemos os sons do tambor, das campás, dos bicos de papá acompañando a Paco Nogueiras co conto de "violín". Xunt@s acompañamos a "cinco ratiños" que sairon do seu tobo na procura de comida, contando cara adiante e contando cara atrás atopamos saborosos manxares ata chegar a un gran perigo!!!

Disfrutamos dun día de praia con "bim, bam, bum" e viaxamos ao fondo do mar para coñecer algúns dos seus habitantes grazas a "polo mar salgado"

Para rematar a sesión de animación Paco Nogueiras contou e cantou un dos seus contos favoritos "un, dous, tres, que ves?"

Queremos agradecer á fabrica de contos Kalandraka esta xornada de animación á lectura, coa que rimos, imaxinamos, cantamos e contamos a través das súas historias da man do grandísimo Paco Nogueiras.

O día das bibliotecas escolares. O aniversario de Papirus!!!

Hoxe foi un día moi especial para as trasniñas e os trasniños e tamén para as súas profes, tiñámolo marcado no calendario, estábamos convidados ao Bibliocastelo para asistir ao aniversario de Papirus!!

Papirus enviounos un convite e contounos que no seu bibliocastelo nos recibiría o alumnado de 2º de primaria para converterse nos nosos padriños e madriñas lectores. Que ben!! poderemos reencontrarnos cos nenos e nenas que foron trasnos hai uns anos!! E tamén con algúns irmáns!!

Preparamos con moito agarimo unhas pulseiras como agasallo e con moita ilusión puxemos rumbo ao Bibliocastelo, alí quedamos abraiadas e abraiados co que nos tiñan preparado!!! Mirade...

Queremos agradecer a Papirus o seu convite e as mestras e alumnado de segundo que nos acolleran e nos agasallaran coa súa arte.

Moitísimas grazas, foi moi emocionante poder estar todas e todos xuntos!!!

Animación á lectura con Kalandraka editora

Dende a fábrica de contos de kalandraka preparáronnos unha gran sorpresa:

Hoxe recibíamos no cole unha visita moi especial, Boniface Ofogo e Marc Taeger, autor e ilustrador dun dos nosos contos favoritos "O elefante que perdeu o seu ollo".

Boniface naceu e viviu moitos anos nunha aldea no interior de Camerún, e especialista en fábulas, lendas, mitos e tradicións da África negra, entre os que destaca "O león Kandinga", outro dos contos que tanto nos gusta.

Marc Taeger, ben coñecido e querido por moitos de nós, é ilustrador e deseñador; a animación, a pintura, a escultura e a arte gráfica son as especialidades dos seus contos, entre os que os trasniños e trasniñas temos moitos moitos favoritos: "Un máis", "Garavanciño", "A verdadeira historia de Carrapuchiña", "Aquiles o puntiño"....

Hoxe xuntos viaxamos ao corazón de África a través dunha fábula para afrontar as dificultades dende a calma e tranquilidade; Boniface contou e cantou e Marc pintou "O elefante que perdeu o seu ollo"

Queremos agradecerlle a Ricardo, de kalandraka editora, por contar co noso cole para esta actividade de animación á lectura. O vindeiro sábado 10 de febreiro, ás 12h no Centro Social do Mar, poderedes gozar coma nós o fixemos hoxe:

Lúa quere viaxar a... Marte

Esta semana as trasniñas e trasniños puidemos desfrutar dun contacontos chulísimo  "Lúa quere vixar a... Marte"

Lúa, unha gatiña branca, non está disposta a renunciar ao seu soño de viaxar a Marte e ser astronauta a pesares das dificultades que atopa no seu camiño. Conseguirá Lúa viaxar a Marte?

Celtia Figueiras, autora do conto, veu cos seus títeres ao noso cole: a gatiña Lúa e o seu amigo o rato; Celtia contounos esta historia que nos fai pensar sobre a igualdade de oportunidades: unha gatiña que quere ser astronauta.

Ao rematar Celtia asinou os nosos

contiños para que sempre lembremos que podemos conseguir todo o que nos propoñamos.

Moitas grazas a Narciso, do Consorcio Galego, e a Celtia Figueiras por facer posible esta actividade; e a todas as familias do cole por agasallar ao alumando con este contiño. 

O aniversario de Papirus

O pasado 24 de outubro, día das bibliotecas, foi o aniversario de Papirus, a mascota da nosa biblioteca; por mor do mal tempo non puidemos festexalo e hoxe, por fin, foi un día de festa!!!

O alumnado de 6ºA e 6ºB baixou ao cole de infantil para exercer de madriñas e padriños lectores das nosas trasniñas e trasniños. Chegaron moi emocionados de voltar ao seu cole no que tan bos momentos pasaron. Cada parella de sexto escolleu a un trasniñ@ e da man buscaron un rinconciño do cole no que vivir un momento moi especial compartindo lecturas.

As trasniños e trasniños déronlle a cada nen@ de sexto un recordo cunha sorpresiña doce para agradecer esta xornada tan marabillosa.

 

 Moitas grazas nenos, nenas e titores. Agardamos poder repetir a experiencia.

Recibimos unha invitación

Hoxe recibimos unha invitación moi especial. Papirus, un polbiño moi simpático, que vive no Bibliocastelo (a biblioteca do cole dos maiores) está hoxe de aniversario coincidindo co día das bibliotecas!!!

Papirus convídanos ás trasniñas e trasniños a súa festa mañá, 25 de setembro. Queredes coñecer a historia do noso polbiño mentres agardamos a que chegue o día?

 Estamos moi emocionados e desexando subir ao Bibliocastelo a festexar o aniversario de Papirus!!!!

Coñecemos a nosa biblio

 Hoxe as trasniñas e trasniños fomos á biblio para comezar co empréstito de libros. 

Observamos todas as seccións que había: contos de animais, de busca e atopa, dos bolechas, contos de emocións, de cartoné... despois escoitamos moi atentas e atentos como temos que coidar os contos e como van colocados nos estantes da biblio para poder deixalos super ordenadiños cando marchemos!!!!

Cada un de nós escolleu un conto para levar a casa e co noso carnet de biblioteca fixemos o empréstito no ordenador.

Ademáis aproveitamos para gozar deste espazo tan máxico e especial lendo unha morea de contos, mirade que ben o facemos!!!!

Día do libro

Este ano os trasniños e as trasniñas festexamos o día do libro dun xeito moi moi especial; convidamos aos nosos veciños e veciñas da Galiña Azul a vir á Biblio do noso cole para compartir lecturas.

Como queríamos que o día do libro fose especial, preparamos con todo o noso agarimo un agasallo para as nosas e os nosos convidados, pintamos e decoramos uns Papirus para que coñeceran á mascota da nosa biblio que sempre nos está animando a achegarnos aos contos.

Recibimos as convidadas e convidados e xuntos fomos á biblio onde lles contamos e signamos o conto "Animais" foi moi divertido aprender xuntos a contar contos falando coas mans.

Logo exploramos xunt@s a biblioteca e compartimos lecturas

Ensinámoslles as nosas aulas e compartimos xogos

E como despedida entregámoslles o noso agasallo

Foi un día lo libro moi especial. Veciñas e veciños, grazas por vir!

Contos en lingua de signos co alumnado do Johan Carballeira!

Hoxe tivemos na escola unha visita moi moi moi especial, o alumnado do Johan Carballeira acompañado pola súa profe Noelia, achegouse á nosa escola para contarnos contos falando coas mans!!

Xuntámonos todas e todos no ximnasio e con eles cantamos, contamos e signamos. "Lúa" "Animais" e "Violín" gustáronnos moito e aprendemos signos novos pero sen dúbida o noso preferido foi "¡Que llega el Lobo!" unha historia que nos enganchou dende o primeiro momento e que rematou cun gran sorriso de todas e todos co seu final inesperado.

E ademáis trouxeron para cada aula un agasallo que nos encantou

Este libro onde están os contos de hoxe en lingua de signos para que poidamos contalos e signalos na clase!!

Pasámolo xenial compartindo cos chicos e chicas do cole de maiores, maiores, maiores! e para as profes foi moi emocionante volver a ter na escola a esta rapazada que fai uns cantos anos estaba nestas aulas con nós compartindo aventuras nos seus primeiros pasos no ensino, nun cole que hoxe lles pareceu moi pequeno; será que elas eles medraron moito...

Moitas grazas chicos e chicas, voltade cando queirades ao que sempre será o voso cole, estamos moi orgullosas de vós!

Animación á lectura de Kalandraka: Paco Nogueiras no noso cole!!

Esta semana recibimos no cole unha visita moi especial, o noso benquerido Paco Nogueiras estivo con nós para compartir contos, música, cancións, sorrisos e ilusións.

Paco trouxo o seu acordeón e unha maleta chea de libros de Kaladraka!! Todas e todos no ximnasio desfrutamos do canto dos paxariños de "Do re mi" contamos e cantamos cos animais "Polo Camino" acompañamos aos "Chibos Chibóns" máis aló da ponte do ogro, descubrimos que malia as diferenzas todas e todos temos "Dez dedos nas más e dez dedas nos pes" e tocamos instrumentos con "Mister Magnolia" á vez que buscábamos a bota que lle faltaba e que finalmente atopamos dentro da maleta de Paco!

Queremos agradecer á fábrica de contos Kalandraka esta xornada de animación á lectura, coa que rimos, imaxinamos, cantamos e contamos a través das súas historias da man do grandísimo Paco Nogueiras. 

Pasámolo xenial!

Un contacontos moi especial

"Un día, o pequeno coello mirou a súa mamá e dixo:

- Mamá, estás moi gorda. Creo que vas ter un bebé!

- Pois si, dentro de pouco seremos máis "

Así comeza a historia do conto "UN MÁIS" dos nosos benqueridos Olalla Gónzalez e Marc Taeger. Unha historia moi familiar que Mariña, Carmen, Noa e Ofelia, unhas ex-trasniñas que xa son moi moi maiores, quixeron compartir con todas e todos nós. Onte, despois de moitos días preparando a visita viñeron as nosas aulas. Foi unha auténtica pasada, fixéronno fenomenal, estamos súper orgullosas delas!!!! 

Moitas grazas a Susana, a súa súper profe, por facer posible este contacontos tan especial, prometemos devolver a visita!!!!!

Guía de lecturas

Baixo o lema "En galego, mil historias para descubrir" o equipo de dinamización lingüística do Morrazo nos recomenda as últimas novidades lectoras e musicais para poder agasallar aos máis pequenos da casa neste Nadal. Premede na imaxe para acceder á guía!!!! 

Aniversario de Papirus

 Hoxe, 24 de outubro, é o día das bibliotecas escolares, e o noso polbiño favorito está de aniversario!!!!

As trasniñas e trasniños recibimos un convite de Papirus para achegarnos ao bibliocastelo hoxe a primeira hora da mañá, pero a choiva non nos permitiu subir ao cole dos maiores; así que entre tod@s pensamos que podíamos ir a cantarlle o parabéns á nosa biblioteca e mandarlle o vídeo para que desfrutara do seu día.

Todas e todas cantámoslle o "parebéns para ti" e bailamos e cantamos a canción de Papirus. Podedes premer no enlace do lateral para seguir cantándoa na casa!!!!

Papirus agasallounos a cada un de nós cun marcapáxinas, que decoramos con moito agarimo, e así poder seguir desfrutando dos libros cada día.

Moitas grazas Papirus, esperamos poder visitar moi pronto o bibliocastelo.

As trasniñas e trasniñas desexámosche un día moi moi feliz!!!!

Parabéns

O Serpicán e o Gatipedro historias de trasnos con Anxo

 Hoxe estivo no cole Anxo González, compartindo canda nós a hora de ler.

Grazas a Anxo coñecemos ao Gatipedro e a Serpicán, dous máxicos trasnos que el descubriu cando era pequeno e cos que compartiu aventuras acompañado do seu avó.

Foi fantástico poder gozar das historias da nosa tradición oral da man de Anxo do que sabemos que foi mestre; como xa traballou moito, agora está xubilado e como é tan xeneroso comparte o seu tempo e a súa sabedoría con nenos e nenas coma nós.

Moitísimas grazas Anxo, estaremos atentas e atentos para dicirlle ho, ho, ho ou ha, ha, ha se miramos ao Serpicán!

Paco Nogueiras visita o cole

Hoxe recibimos unha carta de Paco Nogueiras; escribíunos dende Kalandraka, a fábrica de LIBROS PARA SOÑAR. Nela nos contaba que ás 11.30 estaría no noso cole para cantar e contar con todos e todas nós.

Paco trouxo unha maleta repleta de contos, abrimos moi ben os ollos e as orellas e escoitamos historias de animais, contos de bechos grandes e pequenos, de ratos que van á escola, a historia de Elmer o noso elefante favorito...

Todos e todas nós axudamos a Paco facendo ritmos, lendo, cantando e repetindo retroses como "esta granxa é xenial que apareza outro animal!!!"

Queremos agradecer a Kalandraka editora esta sesión de animación á lectura tan especial e a Paco Nogueiras a súa visita que nos encheu de contos, música, maxia, historias e sorrisos...

O aniversario de Papirus

 Hoxe os trasniños e as trasniñas fomos ata o cole dos maiores, Papirus o noso polbiño preferido estivo de aniversario o pasado domingo 24 de outubro e convidounos a visitalo no seu Bibliocastelo!!

Na aula preparamos con moito agarimo uns banderís nos que compuxemos con letras a mensaxe PARABÉNS PAPIRUS e decoramos con debuxos, cores e pegatas.

No corredor do Bibliocastelo descubrimos que estabamos debaixo do mar e alí pendurado nun recanto atopamos a Papirus, tiña unha fermosa torta de aniversario e unha chea de agasallos, nós cantámoslle o parabéns para ti, e entregámoslle os nosos banderíns como agasallo. Tamén cantamos e bailamos a súa canción... Papirus, ten tres corazóns.....

Entramos no Bibliocastelo e alucinamos co grande que é, está cheo de contos pero ademáis tamén hai uns recantos chulísimos para traballar e aprender!!

As profes contáronnos o conto Corre, corre cabaciña pero... non o contaron coma sempre... representáronno converténdose na avoíña, a neta, o lobo, o oso, o león.... foi moi moi divertido!

Antes de voltar ao cole puidemos ler uns contiños e xa de volta na aula decoramos uns fermosos marcapáxinas que Papirus nos agasallou para que lembremos o día do seu aniversario.

Do Bibliocastelo tamén trouxemos as mochilas viaxeiras, que dende xa, comezan a visitar as casas dos trasniños e das trasniñas para poder gozar dos contos en familia.

Grazas polo convite Papirus!! encantounos visitarte no Bibliocastelo!!!

Día do libro

Hoxe,23 de abril, é unha data moi importante para os trasn@s, conmemórase o día do libro, queredes saber cómo festexamos este día tan especial?

Cada trasniñ@ escolleu o seu conto favorito e  fixemos unha foto con él. Despois baixo o lema DÍA DO LIBRO pegamos as nosas fotos na porta de Papirus para poder ensinarlla ás nosas familias.  Mírade que chulo nos quedou.

Despois cada un compuxo o lema fixándonos moi ben na letra incial, na loxitude de cada palabra (curta. longa ou mediana) e o número de letras (dous, tres ou cinco), así ordenamos o título baixo o que colocamos a nosa foto co conto favorito. E o mellor e máis divertido de todo....

Por qué é o meu conto favorito? 

Unha morea de respostas chulas e divertidas encheron as nosas aulas: 

- porque es el que me lee mamá por la noche

- porque me gusta cuando Cocorico de come todo el biscoito

- porque me hace reír

- porque lo tengo en mi casa

- porque saen moitos animais

Para rematar este día tan tan especial decoramos un marcapáxinas que o equipo de biblioteca do noso cole preparou con moito agarimo. Quedóunos xenial!!!!

Disfrutade do día internacional do libro hoxe e sempre, e recordade que a lectura é a fábrica da imaxinación (Jairo Gomelsky). 

MISIÓN 3: UNIDOS POLA PAZ

Ohhhh familias!!!! estamos moi emocionad@s, Papirus enviounos un novo vídeo. Nel conta o contento e orgulloso que está, o ben que o estamos facendo os trasniños e trasniñas e como pouquiño a pouco estámonos a converter en superheroes e superheroínas comprometidos polo planeta. Queredes velo? Mirade, mirade

En canto rematou o vídeo buscamos a caixiña de Papirus pola clase e nela atopamos unha nova misión, tiñamos que construir unha cadea pola paz. Papirus decidiu que traballásemos agora este obxectivo do desenvolvemento sostible (ODS) "Paz e Xustiza" aproveitando que o vindeiro día 30 festexase o día escolar da non violencia e a Paz. 

Rápidamente por equipos puxémonos a traballar: coloreamos o noso mandilón con moito cariño, a metade do corazón con "barra de labios" vermella  e por último pegamos a nosa foto.

Faltaba un último paso para conseguir o novo selo no noso carné: colocar a cadea no patio de Papirus, así que alá fomos todos e todas a pegar a metade do noso corazón ao ladiño dun amigo ou unha amiga da clase... 

                                                Mirade que chuli quedaron as nosas cadeas!!!

Agora xa sabemos como podemos os trasniñ@s dende o cole axudar a Papirus a traballar pola paz...falándonos con cariño, compartindo os xoguetes, escoitando as aventuras dos nosos amigos e amigas respectando a quenda de palabra.... 

           Misión cumprida, os trasniñ@s conseguimos un novo selo no noso carné!!!!