Hoxe festexamos o Magosto!!! Durante esta semana as trasniñas e trasniños decoramos as aulas e o corredor e fixemos unha coroa, na que pintamos e decoramos unha castaña e compuxemos con letras troqueladas a palabra MAGOSTO.
O noso gran Mago Ramón, sorprendeunos un ano máis coa súa maxia, agochando castañas nos nosos cabelos e facendo malabares; todo iso mentres asaba as castañas que todas as familias trouxestedes ao cole para poder desfrutar desta gran festa!!!
A música de Uxía Lambona comezou a soar e xunto aos nosos compañeiros e compañeiras de 3 e 4 anos comezamos a cantar e bailar a canción "O outono"; logo papamos as deliciosas castañas que asou Ramón acompañadas do zume que escollimos cada un de nós.
Co bandullo cheo e xa moi impacientes chegou o momento máis importante da xornada; despois de dous anos levando a cabo diferentes proxectos de sensibilización coa Asociación de Juan XXIII de Cangas, hoxe unha morea de usuarios viñeron ao cole a facer unha xincana composta por 15 xogos populares, feitos por eles mesmos, na carpintería do seu centro.
Escollimos unha parella e as nosas amigos y amigos da asociación Juan XXIII colgáronnos do pescozo unhas tarxetas co debuxo de cada un dos xogos polos que deberíamos pasar para completar (marcando cun gomet) a xincana.
Os birlos, as bolas ponte, a ra, minizancos, aros, hoquei, paradisco, chapas, torre xigante, fútbol de man,escalada,labirinto, pescar botellas, fútbol pa e a chave foron os 15 xogos que compoñían o circuíto.
Cada xogo foi tan emocionate e divertido que non nos deu tempo a completar toda a nosa tarxeta e quedaron algúns xogos sen marcar.
Queremos das as grazas á “ASOCIACIÓN JUAN XXIII” por contar con nós para participar no seu PROGRAMA“EU = CA TI“ unha iniciativa para mellorar as posibilidades de inclusión real das persoas con discapacidade intelectual na nosa comunidade. Con este programa pretenden achegar o coñecemento da discapacidade aos vosos fillos e fillas e a toda a Comunidade Escolar, contribuindo con ela, no alento de actitudes e valores como a solidariedade, respecto e apoio mutuo.
Grazas a este programa que concedeu o rol de monitores ás persoas con discapacidade, as usuarias e usuarios amosáronnos as súas capacidades aumentando o seu valor social e a súa inclusión.
O obxectivo final deste programa, é "asegurar que os escolares non puxeran a súa atención sobre a discapacidade, senón nunha visión máis positiva, percibíndoos como un monitor máis que ensina, explica e axuda cos xogos" e as profes das trasniñas e trasniños podemos asegurar e afirmar que o obxectivo cumpliuse á perfección. Non podemos estar máis orgullosas de TODAS E TODOS, alumando, usuari@s e familias.
Grazas por vir e por facer que o noso magosto fose un día moi moi moi especial!!!
