O DÍA DE ROSALÍA

 Hoxe festexamos no cole o aniversario da nosa benquerida Rosalía!

Seguindo as indicacións do mandadiño viñemos disfrazados de Rosalía da casa e completamos o noso atuendo na escola... tomando como base a fermosísima ilustración que de Rosalía De Castro fixo a artista Iria Ribadomar preparamos unhas caretas, picando con moito cariño os ollos e pegámoslle un pauciño para poder colocala diante da cara.

Dentro dos poemas que Rosalía escribiu escollemos os primeiros versos de "Eu ben vin estar ó moucho" do seu libro Cantares Gallegos para traballalo na aula, recitámolo, cantámolo, aprendémolo en lingua de signos e decidimos facer o noso particular moucho sobre o penedo para acompañar o poema e completar o noso disfraz de Rosalía.

Primeiro fixemos a cabeza do moucho, colocando dous grandes ollos cuns círculos de cor branco e uns botóns, na cabeza pegamos tamén o pico.

Logo pegamos o penedo, as ás, o corpo e a cabeza do moucho nun vasiño ao que lle fixemos uns buratos e lle puxemos unhas palliñas para lograr maxicamente que o noso moucho se movera...

Cos mouchos rematados e as nosas caretas saímos ao patio para cantar o poema de Rosalía, movendo os nosos mouchos ao ritmo de Migallas.

Animádevos a darlle ao play e cantar canda nós o moucho de Rosalía, pedídelle aos trasniños e trasniñas que vos ensinen a facelo en lingua de signos e tendade facelo ao ritmo da música, veredes que divertidooooo.